Ar ddydd Mercher 24 Mehefin, tarodd dau ddaeargryn dinistriol Venezuela o fewn eiliadau i'w gilydd. Dyma oedd y daeargrynfeydd mwyaf pwerus i daro Venezuela mewn dros ganrif.
Mae’r Cenhedloedd Unedig yn amcangyfrif bod miliynau o bobl wedi’u heffeithio, gyda mwy ‘na dwy filiwn o bobl yn yr ardaloedd sydd wedi’u heffeithio mwyaf. Yn ôl y CU, mae 680,000 o blant mewn angen ar gymorth dyngarol – mae hyn yn fwy ‘na’r nifer o blant yng Nghymru. Mae teuluoedd wedi colli anwyliaid, cartrefi a synnwyr o ddiogelwch.
Yn yr oriau yn dilyn y daeargrynfeydd dinistriol, siaradais gyda Carlos E. Mejia, Pennaeth Effaith/Impact Cymorth Cristnogol yn America Ladin a'r Caribî, sydd yn arwain ar y gwaith cydlynu gyda'n partneriaid yn Venezuela. Meddai bod angen mawr am bethau sylfaenol fel blancedi, tyweli, citiau hylendid, dŵr, bwyd, a chymorth seicolegol.
‘Mae pobl yn delio â cholled fawr, wedi colli anwyliaid, cartrefi, pob dim o fewn eiliadau...
Nid ydych yn bell oddi wrthym. Mae’r byd hwn yn perthyn i bob un ohonom. Dyma’r amser i roi ein dinasyddiaeth fyd-eang ar waith. Mae gweithredoedd o undod yn ein symud ni i gyd ymlaen, tuag at yr urddas a’r hapusrwydd yr ydym oll yn eu haeddu.
Rwy’n annog pobl Cymru, fel yr wyf yn annog pobl ym mhobman, i weithredu fel dinasyddion y byd heddiw wrth i ni gofio ein brodyr a’n chwiorydd yn Venezuela.’
- Carlos E. Mejia
Image credits and information
Ar 1 Gorffennaf, fe lansiwyd apêl DEC ar draws y DU er mwyn cyrraedd anghenion cynyddol pobl sydd yn brwydro i oroesi. Ar y diwrnod yma, ymunom ni gyda’n partneriaid DEC Cymru tu allan i’r Senedd ym Mae Caerdydd. Mae Cymorth Cristnogol yn un o’r 15 elusen sy’n aelodau DEC - ac yn un o 5 aelod yng Nghymru. Wrth i ni gyd-weithio, gwyddom ein bod yn gallu gwneud mwy ac yn gyflymach i gyrraedd y rhai sydd wedi eu heffeithio fwyaf.
Image credits and information
Wrth rannu’r galwad i weddïo ac i ymateb, meddai Archesgob Cymru, y Parchedicaf Cherry Vann:
‘Ni allai neb beidio â brawychu wrth weld y dioddefaint trasig a achoswyd gan y daeargrynfeydd dinistriol yn Venezuela.
‘Mae ein calonnau yn brifo dros y dioddefwyr a'u teuluoedd, ac rydym yn cadw cenedl Venezuela yn ein gweddïau, gan ofyn i Dduw nerthu breichiau’r achubwyr a'r gweithwyr cymorth a chysuro a gwarchod y dioddefwyr. Fel rhan o'n cenhadaeth fel Cristnogion, rydym hefyd yn annog cefnogaeth ymarferol ac ariannol i'n hasiantaethau fel Cymorth Cristnogol sy'n gweithio i helpu pawb sydd wedi'u heffeithio gan y trychineb. Prin y gallai eu gwaith i ddod â gobaith i bobl yn yr amgylchiadau mwyaf torcalonnus fod yn fwy hanfodol.’
Diolch o galon
Mae’r gefnogaeth a’r undod gan bobl yma yng Nghymru ac o gwmpas y Deyrnas Unedig yn codi calon – ac mae’n cadw gobaith yn fyw. Rydym yn hynod ddiolchgar am bob gweddi, pob casgliad a phob rhodd.
Mae £800,000 wedi ei godi yng Nghymru lan at 16 Gorffennaf, diolch!
Image credits and information
Gweddi dros bob un sydd wedi’u heffeithio gan ddaeargryn Venezuela
Dduw cariad,
Wrth i’r ddaear ysgwyd a chartrefi ddymchwel yn llwch, cydia yn ein calonnau, Arglwydd.
Wrth i ôl-gryniadau achosi i’r ofn barhau, cydia yn ein calonnau, Arglwydd.
Wrth i alar ysgwyd teuluoedd i’r byw, cydia yn ein calonnau, Arglwydd.
Anfon ein dwylo a'n traed i gynorthwyo mewn unrhyw ffordd wrth i’n brodyr a’n chwiorydd fyw drwy hyn yn Venezuela.
Boed inni Arglwydd ymateb mewn ffordd sy’n cydweddu â’th ras a’th gariad di.
Amen.
